ਕੁਝ ਗੱਲਾਂ
ਕਦੇ ਵੀ ਅਪ੍ਰਸੰਗਿਕ
ਨਹੀਂ ਹੁੰਦੀਆਂ
ਕੁਝ ਵਿਚਾਰ
ਕਦੇ ਵੀ ਬਾਸੇ
ਨਹੀਂ ਹੁੰਦੇ
ਸਜਰੇ ਖਿੜੇ ਗੁਲਾਬ ਵਾਂਗ
ਹਮੇਸ਼ਾਂ ਹੀ
ਤਰੋ-ਤਾਜ਼ਾ ਰਹਿੰਦੇ ਨੇ
ਕੁਝ ਕਵਿਤਾਵਾਂ
ਕਦੇ ਵੀ ਬੁੱਢੀਆਂ
ਨਹੀਂ ਹੁੰਦੀਆਂ
ਸੱਜ-ਵਿਆਹੀ ਮੁਟਿਆਰ ਵਾਂਗ
ਹਰ ਕਿਸੇ ਦੀ
ਕਸ਼ਿਸ਼ ਦਾ ਕੇਂਦਰ
ਬਣੀਆਂ ਰਹਿੰਦੀਆਂ ਨੇ
ਕੁਝ ਅਹਿਸਾਸ
ਜ਼ਿਹਨ ’ਚ
ਡੂੰਘੇ ਉੱਕਰੇ ਰਹਿੰਦੇ ਨੇ
ਢੇਰ ਸਮਾਂ ਬੀਤਣ ਤੇ ਵੀ
ਮਨ ਨੂੰ
ਟੁੰਬਦੇ ਰਹਿੰਦੇ ਨੇ
ਕੁਝ ਸ਼ਮਾਦਾਨ
ਕਦੇ ਵੀ ਗੁਲ ਨਹੀਂ ਹੁੰਦੇ
ਹਮੇਸ਼ਾਂ ਹੀ
ਰੌਸ਼ਨੀ ਦੀਆਂ ਕਿਰਨਾਂ
ਬਿਖ਼ੇਰਦੇ ਰਹਿੰਦੇ ਨੇ
ਜ਼ਿੰਦਗੀ ਦਾ ਅਹਿਸਾਸ
ਮੁੱਕਣ ਨਹੀਂ ਦਿੰਦੇ
ਕੁਝ ਰਸਤੇ
ਖਾਸ ਹੀ ਹੁੰਦੇ ਨੇ
ਜਿੱਥੇ
ਹਰ ਕੋਈ ਨਹੀਂ
ਤੁਰ ਸਕਦਾ
ਜ਼ਿੰਦਗੀ ਦਾ ਮੋਹ
ਛੱਡਣਾ ਪੈਂਦੈ
ਖ਼ੁਆਰੀਆਂ ਦੁਸ਼ਵਾਰੀਆਂ
ਸਹਿਣੀਆਂ ਪੈਂਦੀਆਂ ਨੇ
ਇਹ ਕੁਝ ਕੁ ਹੀ ਹੈ
ਜੋ ਸਭ ਕੁਝ ਦਾ ਸਰੋਤ ਹੈ
ਬੰਸਰੀ ਦੀ ਮਧੁਰ ਆਵਾਜ਼ ਹੈ
ਜ਼ਿੰਦਗੀ ਦਾ ਨਾਦ ਹੈ.
......................... - ਜਗਮੋਹਨ ਸਿੰਘ
No comments:
Post a Comment