ਪਿੱਛੇ ਮੁੜਕੇ ਦੇਖਣ ਦੀ
ਬਹੁਤ ਬੁਰੀ ਆਦਤ ਹੈ ਮੈਨੂੰ
ਪਛੜ ਜਾਂਦਾਂ
ਇਸੇ ਕਰਕੇ ਹੀ ਹਮੇਸ਼ਾਂ
ਲੰਘ ਜਾਂਦੇ ਨੇ ਸਾਥੀ ਅੱਗੇ
ਮੱਤਾਂ ਦੇਂਦੇ ਨੇ ਕਾਮਯਾਬ ਲੋਕੀਂ
ਹਰ ਥਾਂ ਐਵੇਂ ਦਿਲ ਨਾ ਲਾਇਆ ਕਰ
ਕੰਮ ਕਢਿਆ ਕਰ
ਭੁੱਲ ਜਾਇਆ ਕਰ
ਰਵਾਂ ਰਿਹਾ ਕਰ
ਰਫ਼ਤਾਰ ਵਧਾਇਆ ਕਰ
ਕੋਈ ਵੀ ਹੋਵੇ
ਉਡੀਕਿਆ ਨਾ ਕਰ
ਉਡਿਆ ਕਰ
ਸਮੇਂ ਵਾਂਗਰਾਂ
ਔਹ ਗਿਆ ਔਹ ਗਿਆ ਹੋਣੀ ਚਾਹੀਦੀ ਐ
ਲੋਕੀ ਪੈਰ ਘਸੀਟਦੇ
ਪਿੱਛੇ ਆਂਉਦੇ ਰਹਿੰਦੇ ਨੇ
ਪਰ ਮੈਨੂੰ ਤਾਂ
ਉਡੀਕਣ ਦੀ
ਬਹੁਤ ਬੁਰੀ ਲਤ ਹੈ
ਨਹੀਂ ਟੁੱਟਦੀਆਂ ਮੈਥੋਂ
ਕੱਚਿਆਂ ਧਾਗਿਆਂ ਦੀਆਂ ਤੰਦਾਂ
ਗੱਡੀ ਖੁੰਝਦੀ ਹੈ ਤਾਂ
ਪਈ ਖੁੰਝੇ
No comments:
Post a Comment