ਲੋਰੀ ਲੋਰੀ....
ਰਾਣੀ ਦੁੱਧੋਂ ਗੋਰੀ
ਚੰਦਨ ਦੀ ਪੋਰੀ
ਬਣੀ ਚੰਦਾ ਤੋਂ ਚੋਰੀ
ਸ਼ੱਕਰ ਤੋਂ ਮਿੱਠੀ
ਕਿਸੇ ਨਾ ਡਿੱਠੀ
ਵਾਲ ਕਾਲੇ ਘੁੰਗਰਾਲੇ
ਨੀ ਮੱਖਣਾਂ ਸੰਗ ਪਾਲੇ,
ਨੈਣ ਝੀਲਾਂ ਦੀ ਜੋੜੀ, ਨੀ
ਲੋਰੀ ਲੋਰੀ......
ਬੇਟੀ ਦੂਰੋਂ ਹੈ ਆਈ,
ਭਰੀ ਤਾਂਘਾਂ ਦੀ ਝੋਲੀ
ਹੈ ਨਾਲ ਲੈ ਆਈ,
ਮਮਤਾ ਦੀ ਗੋਦੀ
ਅਗੋਂ ਮਾਂ ਨੇ ਵਿਛਾਈ
ਖੰਡ ਮਿੱਠੀ ਹੈ ਭੋਰੀ
ਭਰੀ ਦੁੱਧ ਕਟੋਰੀ
ਸੌਂ ਜਾ ਰਾਣੀ, ਸੌ ਜਾ ਰਾਣੀ
ਆਈ ਰਾਤ ਸੁਹਾਣੀ,
ਸੁਣ ਮਿੱਠੀ ਕਹਾਣੀ
ਇਕ ਰਾਜਾ ਇਕ ਰਾਣੀ
ਤੈਨੂੰ ਦਿੰਦੇ ਨੇ ਲੋਰੀ
ਲੋਰੀ ਲੋਰੀ......
ਲੋਰੀ ਲੋਰੀ......
ਅੰਬਰਾਂ ਤੋਂ ਚੋਰੀ
ਸੁੱਟੀ ਨੀਂਦ ਨੇ ਡੋਰੀ
ਨੈਣ ਮੁੰਦ ਗਏ ਜ਼ੋਰੀ
ਰਾਹ ਤੇ ਸੁਪਨੇ ਵਿਛਾਈ
ਸੁਹਣੇ ਸੁਪਨੇ ਲੈ ਆਈ
- ਰਾਤ ਨਵੀਂ ਨਕੋਰੀ
ਲੋਰੀ ਲੋਰੀ.......
.............................................- ਪ੍ਰਭਜੋਤ ਕੌਰ
No comments:
Post a Comment