ਉਹ ਔਰਤ - ਸੁਰੋਦ ਸੁਦੀਪ

ਉਹ ਔਰਤ ਮੈਨੂੰ ਹਾਲਾਂ ਵੀ ਯਾਦ ਹੈ
ਜੋ ਕਾਊਂਟਰ ਤੋਂ ਬਟਨ ਚੁਗ ਰਹੀ ਸੀ
ਪੂਰੀ ਸੁਰਤ ਨਾਲ
ਇਕਾਗਰਤਾ ਨਾਲ
ਬਟਨਾਂ ਦੇ ਸਾਈਜ਼
ਬਟਨਾਂ ਦੇ ਰੰਗ
ਸ਼ਾਇਦ ਉਸਨੇ ਆਪਣੇ ਪਤੀ ਦੇ ਕਮੀਜ਼ ‘ਤੇ ਲਾਉਣੇ ਹੋਣ
ਸ਼ਾਇਦ ਨਿੱਕੇ ਬੱਚੇ ਦੀ ਸ਼ਰਟ ਨਾਲ
ਜੋ ਹੁਣੇ ਹੁਣੇ ਸਕੂਲ ਜਾਣ ਲੱਗਾ ਹੋਊ
ਉਹ ਚੁਣ ਰਹੀ ਸੀ ਇਕ ਬਟਨ ਤੋਂ ਬਾਅਦ ਦੂਸਰਾ

ਮੈਂ ਹਾਂ ਕਿ ਪੈਸੇ ਵਗਾਹ ਸੁੱਟਦਾ ਹਾਂ
ਦੁਕਾਨਾਂ ‘ਤੇ, ਰੇੜ੍ਹੀਆਂ ‘ਤੇ
ਚੀਜ਼ਾਂ ਨੂੰ ਭਰੀ ਜਾਵਾਂਗਾ ਥੈਲੇ ‘ਚ
ਅੰਨ੍ਹੇਵਾਹ
ਬਿਨਾਂ ਰੀਝ
ਬਿਨਾਂ ਤੱਕਣੀ
ਬਿਨਾਂ ਵਕਤ ਲਾਇਆਂ
ਇਕ ਕਾਹਲ ਜਿਵੇਂ ਸ੍ਰਿਸ਼ਟੀ ਮੁੱਕ ਚੱਲੀ ਹੋਵੇ

ਉਹ ਔਰਤ ਹੁਣ ਬਟਨਾਂ ਦੇ ਰੰਗ ਦੇਖ ਰਹੀ ਸੀ
ਥੋੜ੍ਹੀ ਜਿਹੀ ਪੂੰਜੀ ਸੀ
ਪੈਸਿਆਂ ਦੀ ਉਹਦੇ ਕੋਲ
ਉਹ ਬਟਨ ਲਾਉਣ ਵੇਲੇ ਵੀ
ਗੀਤ ਗਾਉਂਦੀ ਹੋਊ
............................................... - ਸੁਰੋਦ ਸੁਦੀਪ