ਚੰਗੇ ਨਹੀਂ ਆਸਾਰ ਨਗਰ ਦੇ
ਊਂਘਣ ਪਹਿਰੇਦਾਰ ਨਗਰ ਦੇ
ਰੰਗ ਬਿਰੰਗੀਆਂ ਰੌਸ਼ਨੀਆਂ ਵਿੱਚ
ਗੰਧਲੇ ਕਾਰੋਬਾਰ ਨਗਰ ਦੇ
ਇਸਦੀ ਰੂ੍ਹ ਹੈ ਗੰਦਾ ਨਾਲਾ
ਜੋ ਵਗਦਾ ਵਿਚਕਾਰ ਨਗਰ ਦੇ
ਉੱਚੇ-ਮਹਿਲ ਮੁਨਾਰੀਂ ਵੱਸਣ
ਸਭ ਨੀਵੇਂ ਕਿਰਦਾਰ ਨਗਰ ਦੇ
ਕੱਢ ਲੈਂਦੇ ਨੇ ਅਤਰ ਬਦਨ ਦਾ
ਕਾਰੀਗਰ ਅੱਤਾਰ ਨਗਰ ਦੇ
ਚਲਦੇ ਚਿੱਟੇ ਚਾਨਣ ਵਿੱਚ ਹੀ
ਸਭ ਕਾਲੇ ਬਾਜ਼ਾਰ ਨਗਰ ਦੇ
ਰੌਣਕ ਵਿੱਚ ਕੱਟਦੇ ਇਕਲਾਪਾ
ਲੋਕ ਬੜੇ ਖੁੱਦਾਰ ਨਗਰ ਦੇ
ਜੀ ਲੱਗ ਜਾਊ ਹੌਲੀ-ਹੌਲੀ
ਸਿੱਖੋ ਚੱਜ ਆਚਾਰ ਨਗਰ ਦੇ
...............................................ਸ.ਸ. ਮੀਸ਼ਾ
No comments:
Post a Comment