ਕਾਫ਼ੀ - ਜਾਵੇਦ ਜ਼ੱਕੀ

ਸਭ ਫਿਕੇ ਚੋਲੇ ਲਾਹ ਅੜੀਏ
ਰੰਗ ਰਤੜੇ ਮਨ ਰੰਗਵਾ ਅੜੀਏ

ਰੁਤ ਸਾਵਨ ਮੇਘ ਮਲਹਾਰਾਂ ਦੀ
ਹਰੀਅਲ ਹਰੀਅਲ ਸ਼ਹਿਕਾਰਾਂ ਦੀ
ਸਿੱਕ ਚਾਹ ਕੇ ਸਜਣ ਯਾਰਾਂ ਦੀ
ਜ਼ਾਹਰ ਬਾਤਨ ਭੁਲ ਜਾ ਅੜੀਏ
ਰੰਗ ਰਤੜੇ ਮਨ ਰੰਗਵਾ ਅੜੀਏ

ਰੰਗ ਇਸ਼ਕ ਨਮਾਜ਼ ਸਵਲੜੇ ਨੇ
ਤਨ ਦਰਦ ਹਜ਼ਾਰ ਅਵਲੜੇ ਨੇ
ਬਿਨ ਇਸ਼ਕ ਦੇ ਰਾਹ ਕਵਲੜੇ ਨੇ
ਮੱਦ ਨੈਣਾਂ ਦਾ ਛਿੜਕਾ ਅੜੀਏ
ਰੰਗ ਰਤੜੇ ਮਨ ਰੰਗਵਾ ਅੜੀਏ

ਹੱਦ ਇਸ਼ਕ ਦੀ , ਅੰਤ ਅਥਾਹ ਕਾਈ ਨਹੀਂ
ਰਾਹ ਟੁਰਦਿਆਂ ਮੁਕਦੀ ਰਾਹ ਕਾਈ ਨਹੀਂ
ਜਗ ਵਸਦੇ ਨੂੰ ਪਰਵਾਹ ਕਾਈ ਨਹੀਂ
ਪਰ ਇਹ ਵੀ ਭਾਰਾ ਚਾ ਅੜੀਏ
ਰੰਗ ਰਤੜੇ ਮਨ ਰੰਗਵਾ ਅੜੀਏ.

...................................................- ਜਾਵੇਦ ਜ਼ੱਕੀ

ਕਾਫ਼ੀ - ਜਾਵੇਦ ਜ਼ੱਕੀ

ਮਾਏ ਨੀ ਸਾਨੂੰ ਡਾਢੇ ਰੋਗ ਅਵੱਲੇ ਨੀ
ਸੱਜਣ ਦੂਰ ਦੁਰਾਡੇ ਤੁਰ ਗਏ
ਕਰ ਕੇ ਸਾਨੂੰ ਝੱਲੇ ਨੀ
ਸਾਨੂੰ ਡਾਢੇ ਰੋਗ ਅਵੱਲੇ ਨੀ

ਲੋਕੀਂ ਹੱਸ ਹੱਸ ਖੁਸ਼ੀਆਂ ਮਾਨਣ
ਰੋਂਦੇ ਹਾਂ ਅਸੀਂ ਕੱਲੇ ਨੀਂ
ਸਾਨੂੰ ਡਾਢੇ ਰੋਗ ਅਵੱਲੇ ਨੀ

ਅੰਤ ਵਿਛੋੜਾ ਅੰਦਰ ਸਾੜੇ
ਫ਼ੱਟ ਬਿਰਹੋਂ ਦੇ ਅੱਲੇ ਨੀ
ਸਾਨੂੰ ਡਾਢੇ ਰੋਗ ਅਵੱਲੇ ਨੀ

ਸੱਜਣ ਸਾਕ ਨਾ ਸਾਰ ਵਲੇਂਦੇ
ਤੋੜ ਸੁਨੇਹੇ ਘੱਲੇ ਨੀ
ਸਾਨੂੰ ਡਾਢੇ ਰੋਗ ਅਵੱਲੇ ਨੀ

ਤੇਰੇ ਹੱਥ ਵਿਚ ਜੋਤ ਸ਼ੱਫਾ ਦੀ
ਸਾਡੇ ਦੱਸ ਕੀ ਪੱਲੇ ਨੀ
ਸਾਨੂੰ ਡਾਢੇ ਰੋਗ ਅਵੱਲੇ ਨੀ

.......................................- ਜਾਵੇਦ ਜ਼ੱਕੀ